Saturday, January 24, 2015

வருடங்களுக்குப் பிறகு ஒரு கவிதை




காட்டாற்றுக் குட்டைகளில் 
நரிகள்   விழித்திருக்கும்
வேலிக் காடுகளைத் தாண்டி
நீரருந்த இறங்குகின்றன
மந்தையாடுகள்

ஆட்டிடையனும் இறங்குகிறான்
வண்டி மாடுகள் இறங்குகின்றன
கரிசல் பறவைகள் இறக்கை
நனைத்துப் படபடக்கின்றன
மண்வெட்டிகள்
கூடைகள்
சும்மாடுகள்
எல்லாம் இயக்கம் கொள்கின்றன
ஆறெங்கும் மணல்வெளிகளில்
பூத்து எழுகின்றன ஊற்றுகள் 

பிளாஸ்டிக் குடங்களும்
தவலைப் பானைகளும்
இறங்குகின்றன
மிதிவண்டிகளுடன் ஆண்கள்
பழக்கப் பேச்சுகளுடன்  பெண்கள்
இறங்குகிறார்கள்

கடைசியாக இறங்கிய
நீரள்ளும் அகப்பைகளில்
மிதந்து மிதந்து வருகின்றன
உனது நீர்க் கண்கள்

No comments: