பைத்தியக்காரன் என்றழைக்கப்படுபவனின் கவிதை

*உங்களுடைய சித்தங்கள்
எனக்குப் புரியவில்லை
என்னுடைய கவிதைகள்
உங்களுக்குப் பிடிக்கவில்லை

*உங்களுடைய சொற்கள்
காற்றில் நீந்திக்கொண்டிருக்கின்றன
என்னுடைய சொற்கள்
சருகாக மிதக்கின்றன

*என்னழகை உணரமுடியாதவள்
என்னுடலை வெறுக்கிறாள்

*நான்
நிராகரிக்கப்படுகிறேன்
தோற்கடிக்கப்படுகிறேன்
ஏமாற்றப்படுகிறேன்
எல்லாயிடங்களிலுமிருந்து
புறகணிக்கப்படுகிறேன்

*என் அறையின் எல்லா கதவுகளையும்
மூடிவிடுகிறேன்

இதோ
நான் நட்டுவைத்த ரோஜா
தளிர்விட்டிருக்கிறது
அதையும்
என் புது நாய்க்குட்டியிடம் மட்டுமே
பகிர்ந்துகொள்ளப்போகிறேன்.